Xosé Luís, "RUCHO", debuta en 3ª co CD Lalín

Xosé Luís Lamas, máis coñecido polo nome futbolístico de Rucho entre os compañeiros da EFL, aínda sendo xuvenil, debutou o domingo en 3ª División co CD Lalín. Foi na segunda parte, ante o Arousa, partido que rematou 2-1 para os locais.

Durante as catro tempadas que estivo na Escola de Fútbol Lalín, onde se formou desde a pretempada 2003-2004, ano da súa fundación, Xosé Luís, ademais das súas enormes cualidades deportivas, sempre se distinguiu polo seu traballo e magnífico comportamento. Ao longo das categorías infantil, cadete e xuvenil, baixo as ordes de Montouto na primeira e de César nas tres últimas, a pesar dalgunhas lesións que tivo que soportar, formouse como un magnífico central e mellor compañeiro e alumno. Os membros da EFL queremos felicitalo e, ao tempo, poñelo de exemplo de seriedade e constancia. O seu debut en 3ª é un premio para el e para todos nós.
Nestas fotos vemos a súa evolución. Aí o temos desde os inicios na pretempada de infantís nas beiras do campo, pois o de herba artificial estábase facendo, pasando polas formacións infantil, con algún lance de xogo, a cadete, coa celebración do ascenso, ata o equipo xuvenil.Noraboa, Rucho.

Ante todo: esquí acuático

Esta fin de semana aliáronse todos os elementos para fomentar a práctica do deporte na herba artificial do estadio Manuel Anxo Cortizo, o que pasa é que houbo certas confusións, pois os que foron ao campo non levaron nin bañador nin moito menos esquís. Así que houbo que improvisar unha modalidade máis próxima ao water-polo que ao fútbol, porque outra cousa non habería, pero auga... a baldes!

Primeiras formacións Benxamíns

BENXAMÍN A: De pé: Sueiro(adestrador), Lorenzo, Brais, Alex, Rivas, Manu. Anicados: Rubén, Martín, Fran, X. Manuel e Oscar
BENXAMÍN C: De pé: Toño (adestrador), Blankiño, Marcos, Dani Ramos, Manuel. Anicados: Fran, Marcos Díaz, Álvaro, Jacobo, Guille e Carlitos.

Paso aos Benxamíns

Tiveron que pasar catro interminábeis meses nos que o coordinador fixo malabares para "entreter e motivar" sen competición, pero chega o momento agardado: PRINCIPIA a LIGA BENXAMÍN.

Con tres equipos, con moitas caras novas (máis ca nada pre-benxamíns) e con todos os desexos de pasalo ben, érguese o pano para os máis cativos.
Nesta tempada, que chega ata finais de Xuño, Toño, Pablo e Sueiro dirixen as escadras da categoría máis complexa da Escola de Fútbol Lalín, por cantidade e por problemática, debido ás idades dos xogadores.
Na EFL agardamos deportividade e o máis exquisito comportamento, dentro e fóra do campo. Os rapaces meréceno, e nós gocemos do espectáculo e colaboremos.

Arrinca a 1ª xornada con estes enfrontamentos:
EF Lalín A- At.Melide
Dubra - EF Lalín B
EF Lalín C - Silleda
Aínda que nestas fotos non están todos, que ninguén o dubide: chegará o seu intre.

Ánimo "Bandeira"!

Xa non está con nós, pero non importa. Adrián, alias "Bandeira", nas tempadas que pasou na Escola de Fútbol Lalín deixou sobradas mostras da súa calidade persoal e deportiva como para que agora non nos acordemos del. E moito máis neste difícil intre, cando leva tantos meses sen poder xogar por mor dunha grave lesión.

Desde a familia da EFL, cunha foto súa de hai anos, queremos darlle ánimos para que volva canto antes aos terreos de xogo co seu actual equipo, o CD Lalín xuvenil.
Agardamos o teu regreso!

Os de Conxo

Chéganos en exclusiva a foto dos vencedores do Triangular alevín de fútbol 7 de Conxo. Non hai mellor maneira de despedir o ano 2007 que amosar o potencial en Compostela.
De pé: Rafa Dacosta (adestrador), Marcos, Ionatan, Dani Areán, Serguinho, Manu, Adrián e Xosé Ramón. Anicados: Dani Gómez, Xabi Rei, David Domínguez, David García, Xabi "a Pulga", Rodrigo e Jorge.

Barreira "made in EFL" en vídeo

Trátase da 1ª experiencia cun vídeo neste blog. A ver se sae.

A toma, moi caseira (polo tanto, magnífica) realizouse nas finais do Torneo interno (ou internacional?) da categoría pre-benxamín. Sueiro estaba alí para dar fe deste momento para a historia. A barreira de catro xogadores que se forma ante unha falta directa é un modelo a copiar por cantas escolas de fútbol desexen mellorar nesta estratexia. Pasará aos anais da EFL e do You Tube. Palabra.

Cuíña e a EFL

Xosé Cuíña non era, nin moito menos, un asiduo do campo de fútbol, pero remexendo no arquivo fotográfico da Escola de Fútbol Lalín atopamos unha imaxe que nos relaciona, aínda que só sexa un chisquiño. Trátase da tomada naquel sábado 13 de Decembro do 2003, cando se procedía á inauguración do campo de fútbol de herba artificial. Nun discreto segundo plano, á dereita, atopamos ao político de Filgueira acompañado de xogadores da Escola e doutras personalidades (Fraga, Louzán e Crespo). No seu pasamento, convén recordalo na nosa Pequena Historia.

Camilo "contactando"

Aínda que as "cousas" de Camilo son exquisiteces técnicas que hai que degustar sen ollar nin para o resultado nin para o sistema (ou sexa, miralas con ollos que gustan da creatividade), o certo é que por veces nos agasalla con loitas corpo a corpo que lle dan ese toque de excepción que todo xogador precisa. Non é que Camilo fuxa habitualmente do contacto, é que non se considera capacitado para levalo a cabo. Nesa consideración mental radica o erro. E sirvan de exemplo estas dúas instantáneas (case calcadas, por diante e por atrás), nas que nos decatamos de que o fútbol é un deporte de contacto. Así pois, se hai que ir á batalla, vaise. Incluso Camilo.

II Torneo Alevín de Nadal en Compostela

Nestas fotos (en experimental "collage fusionado") están os xogadores que formaron a selección alevín da EFL que o este sábado 29 de Decembro, en Santiago de Compostela, participaron no II Torneo de Nadal do Deportivo Conxo, fútbol 7 categoría alevín.
O equipo da EFL, dirixido por Rafa Dacosta, CAMPIÓN en Compostela.
Resultados e goleadores dos partidos:

EF Lalín-Conxo: 3-2 (David, Xabi "a Pulga" e Adrián)
EF Lalín-Cambados:7-3 (Adrián 4, Manu 2 e Rodrigo)
Cambados-Conxo: 6-6 -Teremos que aumentar as vitrinas para os trofeos?
-E teremos.

Finais do Torneo Interno Pre-Benxamín

Estas son algunhas das fotos da festa do fútbol que se viviu o sábado 22 no campo de fútbol. Rematou o Torneo interno da EFL con toda a intensidade. Moito público, diversión e emoción entre os máis novos da Escola. Xa falta pouco para a liga, pero semella que non dá chegado.

FELIZ NAVIDADE da EFL

Segundo lemos en Vieiros.com:

Moito antes de que o Papá Noel ou Santa Claus viñese importado dende outras latitudes, en Galiza había unha figura mítica propia do Nadal: O Apalpador. Mais nestes tempos de présa e consumo, o persoeiro autóctono ficou no esquecemento.

O Apalpador seica é un vello xigante, de oficio carboeiro, que vive nas devesa das altas montañas. Na noite de Nadal baixaba ás aldeas para achegarse aos nenos e ás nenas que durmían. Caladiñamente, apalpáballes as barrigas para ver se os pícaros estaban ben alimentados. Logo de desexarlle que no ano vindeiro non pasasen máis fame, marchaba deixándolles unha boa presada de castañas quentes.
Algúns cren que se trata dun costume de orixe pre-cristián que no seu momento debeu estar espallado por todo o país e que foi desaparecendo progresivamente.

Bo Nadal e deportivo Aninovo

O Partido

Domingo 23, 12.00 horas:
ese é o momento que non hai que perder. Os "Gladiadores da EFL" reciben ao todo poderoso DEPOR B na pugna polo campionato de Liga Galega Cadete. É o PARTIDO.
Non puido ser. 1-3, resultado final.

Collendo estilo

Chámase Daniel Álvarez Portela, alias Dani. Chegou á Escola a principios desta tempada co seu irmán, o infantil Iván. Dani, ademais dese chisco de traste que todo crío debe ter, xoga nos benxamín, está sempre enredando polo campo, axuda no que pode aos adestradores (e máis que lle mandaran) e, por riba, perfecciona o estilo, que de certo mellorou. Para mostra, a foto. Que máis se lle pode pedir a esta futura figura do balompé?

As "batallas" de Mario

Aínda que todos sabemos do valor de Mario García Louzao, o capitán do equipo Infantil A e participando no cadete B da EF Lalín, pode que moitas veces pase desapercibido "ese outro labor" de conxunto, sobre todo cando xoga no medio campo. Polas instantáneas que tiramos no partido contra o Cidade de Santiago vemos mellor tal comportamento.Mario sempre está disposto a competir, sempre aparece activo, sempre dando axudas aos compañeiros, sempre cortando o balón ou o xogo dos contrarios, sempre poñendo toda a carne no asador e entregándose ao máximo. Porque converte cada xogada de cada partido nunha auténtica batalla que dá os seus resultados e beneficia aos demais. Nunha Escola coma a nosa, na que intentamos que predomine o xogo combinativo, Mario é un exemplo a seguir, porque o fútbol tamén é contacto e pundonor. Por iso, Chapeau para el!

O FUTURO xa está con nós

Campionato Prebenxamín EFL: Emoción e intensidade .
Que ben o pasan os tíos estes!

COMENTARIOS no blog

Apertura a comentarios.Ata hoxe tiñamos pechada a posibilidade de escribir comentarios no blog da EFL. Os exemplos do que se ve en Internet eran e son o suficientemente irrespetuosos como para permitilos. Se agora abrimos esta posibilidade é a modo de proba: para que fagades suxestións, comentedes o que vos preocupa, digades o que queredes dicir e fagades que todo mellore, pero sen insultos, evitando a linguaxe soez e vulgar ou as opinións infundadas e irrespetuosas cara a entidades ou persoas. Esa será a única limitación.
Se logramos que os nosos comentarios ou opinións sexan formativos e educados, como pretendemos que sexa a Escola de Fútbol Lalín, seguiremos permitíndoos. Así que, xa que esta bitacora é cousa de todos, participar toca!

Cheroki: un infantil en Liga Galega cadete

Auténtico papelón o que superou Cheroki este domingo. Se xa non é fácil debutar nunha categoría superior, moito peor é facelo de porteiro, en Liga Galega cadete e ante un óso duro de roer como foi o Xuventú de Aguiño. Arroupado por Alex Sánchez, que pasou todo o partido animándoo, o gardarredes cumpriu como un campión debaixo duns paus que estaban moi moi lonxe. Ademais, tralo maior tropezo do Depor B, os cadetes fixéronse co liderato.

O sr. Floro, un clásico

Se hai un seguidor que vive intensamente cada partido, ese é Floro, o avó de Diego Peña, porteiro cadete. Este domingo, aínda sen ter ao neto no campo, seguiu ordenando desde a banda, aleccionando, cabreándose e ofrecendo a súa retranca, mesturada con eses necesarios apontamentos técnicos que non pasan desapercibidos para ninguén. Cando el está, seguramente o equipo non precisa máis ca estar atento ás consignas deste verdadeiro clásico da EFL. Sábeno os cadetes A.

Que siga así moitos anos!

Golpe de autoridade

A Liga Alevín, case sentenciada.

Nun esperado partido no que se enfrontaban os dous primeiros clasificados da Liga Alevín, SD Cruces e EF Lalín A, con moito ambiente e público nas gradas, o equipo que dirixe Willy deu un golpe de autoridade na competición e venceu cun contundente 10-1, o que deixa a Liga case (porque tampouco convén fiarse) sentenciada.
Cun xogo combinativo espectacular e un equipo moi ben estruturado, no que as individualidades estaban ao servicio do colectivo, os lalinenses, da mao dun matador Adrián, puxeron en pé a un público emocionado (o lalinense) e resignado (o cruceño).

Noraboa, rapaces!