botes e botellas contra a gripe A

A Coordinación deportiva da Escola de Fútbol Lalín, ante o inicio dos adestramentos na 1ª semana de agosto e sen ánimo de crear alarma, acaba de tomar unha medida preventiva ante a GRIPE A que se fai extensiva a xogadores e adestradores:
Todos os deportistas da EFL deben vir provistos dunha botella, bote ou recipiente individualizado para hidratarse durante as sesións de adestramento.

Estes deben ser reutilizábeis, é dicir, cando se acabe o líquido poderán encherse de novo de auga da traída ou da auga embotellada que merca a EFL. Así, cada deportista terá o seu bote exclusivo e levarao e traerao da casa, sendo responsábel do seu coidado e limpeza. Pode e debería estar personalizado co nome a rotulador, ser o da súa bici ou de calquera marca que lle praza (mira os exemplos da foto). O único que se lle esixe é que se distinga do dos demais.

Finalmente lembrar que quen non o traia non poderá beber do dos outros compañeiros e sempre lle quedará unha billa que seguramente xa usaron moitas outras persoas, pois de inicio (repetimos, como sinxela medida hixiénica preventiva) a EFL non vai poñer a disposición do grupo nin as tradicionais garrafas de 5 litros nin as botellas de 1´5, e moito menos botellas pequenas de usar e tirar que estarían ciscadas a centos polo recinto deportivo.

A EFL só aportará auga para encher os botes individuais.

Por se alguén non le o blog, faille un favor, coméntallo antes de iniciar os adestramentos.