Despedida fútbol 7: Puerto de Gijón

Este sábado 28 de xuño a EF Lalín pecha o "quiosco" por esta tempada nas dúas categorías de fútbol 7 (alevín e benxamín, pois como informamos os prebenxamíns xogan pola tarde a Copa do Futuro en Vigo). E convén despedir a tempada como se merece: con alegría polo ben feito. Hai que coller vacacións (os adestradores precísanas, por simple desgaste ante tanto cativo estrebillante) despois dun duro e exitoso traballo (lembremos que son os campións das súas respectivas ligas) e para iso nada mellor que o xa tradicional enfrontamento contra os nosos amigos do Puerto de Gijón.

Horario de encontros:
12.00: EF Lalín-Puerto de Gijón (alevín, campo 1)
12.00: EF Lalín-Puerto de Gijón (benxamín, campo 2)

Copa do Futuro: 3º clasificado

Parece que si, hai futuro. Tal e como xogan, tal e como o celebran, tal e como o pasan... Con Sueiro á fronte.
Patrocinado pola Deputación de Pontevedra, estase a celebrar en toda a provincia o campionato COPA DO FUTURO de fútbol 7 para Pre-benxamíns. A pasada fin de semana o acontecemento foi no campo de Lalín, onde a Escola de Fútbol Lalín se impuxo con total claridade, clasificándose para as fases finais. As fotos correspóndense aos dous equipos que competiron pola EFL. Este sábado e domingo, 28 e 29, celebráronse en Vigo as finais.

CALENDARIO para os nosos, sábado 28 de xuño:
16.30: Cruceiro B-EF Lalín: 0-8
17.30: Porriño-EF Lalín: 1-1
19.00: Moañesa-EF Lalín: 1-4
20.00: EF Lalín-Col. Santiago Ap.: 2-0
domingo 29:
4º final: Rápido Bouzas-EF Lalín: 1-1
Semifinal: Cruceiro A- EF Lalín: 2-0
3º-4º posto: EF Lalín-Col. Santiago Ap.: 2-0
Podedes ver a información completa (normas, resultados, fotos, etc) na paxina copadelfuturo.com

Benxamíns campións!!!!

Tarde de fútbol, ambiente e emoción o vivido este xoves no campo de herba artificial. Dous partidos de fútbol 7, tres equipos da Escola de Fútbol Lalín competindo, moita paixón entre os familiares e tradicional baño dos campións e dos seus camaradas na fonte da rotonda de DonRamiro. O día prestábase.
Se o primeiro partido en rematar foi o da vitoria do equipo C de Toño ante o Touro (3-1 final), os minutos que durou o enfrontamento entre os pupilos de Sueiro e os de Pablo (cos seus múltiples manexos de xogadores: ora cativos, ora grandotes), levaron a tensión ás gradas, pois faltaban catro minutos e o equipo B sorprendía con dous goles de vantaxe, o que lle poñía ao equipo A o campionato moi costa arriba. Os dous goles finais fixeron xustiza ao visto no campo e puxeron as cousas no seu sitio: 6-6. De novo, o título queda no peto da EFL.

Noraboa a xogadores, adestradores e pais/nais dunha categoría na que se vive doutro xeito o deporte e no que sempre permanece a ledicia de ver xogar ao fútbol e divertirse aos máis pequenos.

Ademais, puidemos comprobar que, con chupeta e todo, HAI FUTURO!!!!!

Un ano despois...

Un ano despois, si, porque este 1º de xuño cumpríronse exactamente doce meses desde a apertura deste blog da EF Lalín. E hai que proclamalo e celebralo.

Máis de vinte mil entradas, centos de fotos, algúns comentarios (nunca do gusto de todos, loxicamente), toda unha tarefa de Escola e moitas ilusións. Así resumimos a nosa presenza en Internet desde o verán do 2007. Opinións haberá para todos os gustos, pero do que non cabe dúbida é de que eflalin.blogspot.com proporcionou ese algo máis que tamén conta. Moitos xogadores e os seus familiares souberon aprecialo así. O noso agradecemento.Agora é tempo de indicar que todo é mellorábel, pero que dá traballo. E como o compromiso pola miña parte (perdón por falar en 1ª persoa, será a única vez nas entradas) rematou, deberemos replantexarnos como, quen e cando seguir con esta tarefa, pois isto non pode ficar aquí.

E como non sabiamos que foto insertar, vai unha que sintetiza a nosa ilusión.

Adrián, co Villestro e na TVG

O coordinador da categoría alevín, Rafa Dacosta, logo de dar permiso para que o alevín Adrián participe co Villestro (realmente trátase dunha selección de xogadores de Santiago) no Torneo de Futbol 7 Arousa Cup, comunícanos o horario do partido máis agardado:
Sábado 7 de xuño, ás 11.50:
R.Madrid-Villestro
Se poñemos esta noticia é porque seica vai ser retransmitido pola TVG. Así pois, se os seareiros da EFL queren seguir ao noso "matador", que este ano gañou dúas ligas (co alevín A e co infantil B), ese é o día e a hora.

Benxamíns: co título de Liga case no bote

Unha tempada máis a categoría benxamín está a piques de ter un campión. A EF Lalín que coordina Sueiro e adestran Toño González e Pablo. Así pois, o Grupo 6º de fútbol 7 de Santiago, tralas dúbidas iniciais (que, todo hai que dicilo, lle deu salsa á liga), está case resolto tralo empate a uns co Estrada A, e o posterior tropezo deste en Callobre. Quédanlle algúns partidos de trámite ao equipo A, pero todo parece moi complicado para que a Escola non recunque co campionato. Agora dámoslles a todos os benxamíns a noraboa polos últimos resultados. Cando se teña a pel cazada, falaremos de máis. Serán outros "clásicos"

Torneo F-7 Alevín na Estrada

IV TORNEO ACOE FÚTBOL ALEVIN
(3ª posición da EFL)
Data: sábado 14 de xuño do 2008
Hora inicio: 16.00 Lugar: A Estrada
Partidos a 25´a tempo corrido.
GRUPO I: SP.ESTRADA A, SILLEDA, TOURO, EF LALÍN
GRUPO II: SP.ESTRADA B, CALLOBRE, CRUCES, CUNTISHORARIO e RESULTADOS PARTIDOS da EFL:
16,30: EF Lalín-Touro: 3-0
17.00: SP.Estrada A- EF Lalín: 2-3
18.30: Silleda- EF Lalín: 4-0
SEMIFINAIS: EF Lalín-Cruces: 0-1
3º e 4º posto: EF Lalín-Callobre: EFL por penaltis
FINAL: SP Estrada-Cruces: SP Estrada por penaltis

FIN DE SEMANA

Sábado 28 e Domingo 29 de xuño de 2008
XUVENIL:
CADETE :
INFANTIL A:
INFANTIL B:
ALEVÍN A e B :
BENXAMÍN A: E.F. Lalín- ED. Val do Ulla: 8-6 (Brais 2, Rivas 2, Franchi, Fernando, Martín e Alex)
BENXAMÍN B: Callobre c.f. - EF Lalin B 1 - 2 (Cristian e Santi)
BENXAMÍN C: E.F.Lalín - Sp. Estrada B : 4-4 (Guille, Dani Ramos, Ángel 2)

Xabier Montoto: Coordinador de Fútbol 11

Da Asemblea da EFL celebrada o pasado xoves, ademais da preceptiva análise deportiva 2007-2008 por parte dos Coordinadores (César de xuvenís, Montoto de cadetes, Richi de infantís, Rafa de alevíns e Sueiro de benxamíns), da presentación das contas da tempada por parte do Tesoureiro (David Alvarellos), un ano máis con superávit, a noticia máis destacada foi a que proporcionou o Secretario, Xavier Galego: Xavier Montoto, trala proposta do Corpo Técnico e da Directiva, despois duns días para meditalo, aceptou ser o coordinador de fútbol 11 para a tempada 2008-2009.Así pois, para a vindeira tempada prodúcese un cambio estrutural no funcionamento deportivo da EFL: en fútbol 7, debido á súa complexidade, séguese co sistema de un coordinador por categoría (alí se aventurou a posibilidade de que Sueiro e Richi coordinen o fútbol benxamín e alevín, aínda que falta confirmalo) e en fútbol 11 óptase pola fórmula dun único coordinador (Montoto).
Tamén cómpre informar que, como nas últimas tempadas, que haxa 2º equipo de cadetes dependerá dos matriculados na Escola, polo de agora non chegan a 30, número que se considerou mínimo para manter os dous equipos. Así pois, quen teña pensado inscribirse, que o faga canto antes, sobre todo nesta categoría (nacidos nos anos 93 e 94).

Torneo POLVORÍN de fútbol base

21-22 e 23 de xuño 2008,
no novo campo de herba artificial do Polvorín, LUGO,
impresionante, polos equipos que veñen competir, TORNEO DE FÚTBOL BASE da SDC Polvorín no que a Escola de Fútbol Lalín participará con dúas escuadras: unha alevín e outra benxamín.
Como di Sueiro, "os enfrontamentos son chulísimos". E complicados tamén. Vexámolos.
ALEVÍNS: grupo 3: sábado 22 de xuño:
10.00: Celta de Vigo-EF Lalín
16.30: Residencia-EF Lalín
18.30: Lorca Dep.-EF Lalín
21.00: Vilalbés-EF Lalín
Clasifica o 1º de grupo e os 3 mellores segundos dos 5 grupos de 5.
BENXAMÍNS: grupo E: sábado 22 de xuño:
11.00: Ponferradina-EF Lalín
14.00: CD Lugo-EF Lalín
19.00: Santander-EF LalínClasifica o 1º de grupo e os 3 mellores segundos dos 5 grupos de 4.
Os partidos na fase inicial son a 2 tempos de 12´.
Podedes ampliar información en www.sdcpolvorin.es/torneofb/

ASEMBLEA DA EF LALÍN

Este xoves, 29 de maio, ás 21.30 horas, no Salón de Actos do IES Laxeiro de Lalín, terá lugar a Asemblea Final de tempada da Escola de Fútbol Lalín. A ela están convocados todos os socios e socias (pais, nais ou titores legais dos xogadores).
En canto á orde do día, a Directiva e o Corpo Técnico da EFL renderán contas deportivas e económicas da tempada 2007-2008, e trazarán as liñas mestras da vindeira.
Todos aqueles interesados en facer preguntas, ofrecer suxestións, saber o estado da entidade ou mirar cara ao futuro non poden deixar de asistir. A EFL é de todos.

GALO CUP de Cruces: Torneo Alevín

FASE FINAL DO GALO CUP.
De moi bo hai que calificar o comportamento dos alevíns da EFL no Torneo de Vila de Cruces, no que chegaron á final ante un Villestro moi reforzado con xogadores doutros equipos de Santiago. Aínda así, no primeiro tempo aguantamos o tirón e fómonos ao descanso gañando (0-1). Só na segunda parte , cando fallaron as forzas polo cansazo, eles foron superiores e impuxéronse finalmente por un rotundo 4-1. Antes tiveramos que eliminar ao anfitrión , a S.D. Cruces, nun partido moi disputado.

Estes foron os seus RESULTADOS.
CUARTOS DE FINAL:
EF Lalín - SP. Estrada: 1-0
SEMIFINAL:
S.D. Cruces - EF Lalín: 1-2
FINAL:
Villestro - EF Lalín: 4-1

Fase de Ascenso Infantil: eliminados

Cidade de Santiago 4-EF Lalin 2 (Recimil e Adrián)
Se xa o resultado da ida era unha montaña, o nivel amosado polo cidade de Santiago no partido de volta fixo que resultase un imposíbel. Adaptados coma ninguén a unha rateira de campo de terra, o poder físico e mental do segundo ano fixo o resto. Aínda que sobrevivimos cun 2-2 ao remate do primeiro tempo (efectivo ao 100% pola nosa parte, e no que eles estragaron varias ocasións claras de gol), co terceiro tanto aos vinte minutos da reanudación, o equipo baixou os brazos e xa non foi capaz de sobrepoñerse. Merecida clasificación, pois, do Cidade, sen dúbida o equipo máis forte.
En todo caso hai que felicitar aos infantís, que plantaron cara e pelexaron canto deron nun campo que non nos era propicio e ante un rival superior. Despídense da Fase e da tempada coa cabeza moi alta.

Campionato Infantil en Silleda

24-31 MAIO- SILLEDA
GRUPO A: SD Silleda, EF Lalín, At. Melide
GRUPO B: SP Estrada, SD Cruces, Callobre CF
FASE PREVIA 24/05/08
(Partidos de dous tempos de 20´, cun descanso de 3´)

9.30	SD SILLEDA A-E.F. LALIN B	2-0
10.15	SD Silleda B-S.D. CRUCES	0-1
11	E.F. LALIN B-AT. MELIDE	2-2
11.45	S.D.CRUCES-CALLOBRE CF	1-1
12.30	SD SILLEDA A-AT. MELIDE	6-0
13.15	SD Silleda B-CALLOBRE CF	0-3

FASE FINAL: sábado 31-05-08
Partidos de 2 tempos de 25´, descanso de 5
15.30: Silleda A-SD Cruces: 5-1
16.30: Callobre CF-EF Lalín B: 0-3
18.00: Final: SILLEDA- EF LALÍN B: 3-0
Entre a 2ª semifinal e a final (17.30-18.00 h.) fíxose un campionato de penaltis por parellas (eliminatoria directa ó mellor de tres lanzamentos), nas porterías de Fútbol-7.

Non puido ser na ida

Partido de ida da Fase de Ascenso a Liga Galega.
EF Lalín 1 (Iván, de cabeza)-Cidade de Santiago 3

Nada que obxectar ao resultado, pois os santiagueses demostraron o seu poderío. Pero a EF Lalín tivo oportunidades para cambiar o signo do partido. Con 1-1 no marcador, Dani estragou un mao a mao co porteiro, e mesmo Adrián chegou desequilibrado a un claro rexeite. Logo o Cidade meteu o 1-2 nunha falta inexistente, pero Brais aínda tivo outra clarísima ocasión para empatar. E xa ao final o Cidade redondeou o resultado cun elaborado 1-3.
Bo ambiente, moita tensión e deportividade. Resaltar o esforzo e traballo de todos os xogadores nun enfrontamento ao que o noso equipo chegaba moi ferido, pois ás baixas de Juanillo e Luís houbo que sumar un Rubén que se sacrificou para poder xogar, e Dani, que chegou moi xustiño na súa recuperación. Aínda así, e coa metade de xogadores de primeiro ano, fíxoselle fronte a un sólido Cidade (todos de segundo). Queda a difícil volta, pero hai que xogala. Pola EF Lalín Richi aliñou a: Alex, Rubén, César, Guille e Iván; Recimil, Mario, Marco e Ioni; Pájaro e Adrián. Tamén xogaron Dani, Boyan e Brais. Cheroki e Serxio estiveron na convocatoria.

ESTREO DA ÚLTIMA PELÍCULA DE INDIANA JONES.
O próximo venres, día 23 de maio, ás 17,15 todos os xogadores da EFL. están convidados á presentación dos Torneos da FUNDACIóN DEPORTE EN LALIN nos cines FILMAX do Centro Comercial Pontiñas Haley. Ao rematar a presentación dos torneos, poderán asistir gratis ao estreo da ÚLTIMA PELI DE INDIANA JONES. Iso si, para poder identificalos deben levar posto o chándal da E.F.L.

Torneo do Depor (alevín e benxamín)

Sábado 17 de Maio (LETRAS GALEGAS TODO O ANO)
No Mundo do Fútbol, Abegondo.
Alí estarán dous representantes da EF Lalín para competir nun enorme Torneo de F-8 para alevíns e de F-7 para benxamíns.
GRUPOS e CALENDARIO da EFL:
ALEVÍNS:
grupo 8: Residencia B, SP.Meicende, EF Lalín.
10.00: EF Lalín- SP. Meicende
12.30: EF Lalín- Residencia BBENXAMÍNS:
grupo Y: Pavillón A, Eume, EF Lalín
10.50: EF Lalín- Eume (3-0)
12.05: EF Lalín- Pavillón A (0-3)
Para máis información sobre este Torneo (horario completo, normas, grupos...), consultar a ligazón do Deportivo nesta mesma páxina. A EF Lalín figura no lugar do Galicia GAITEIRA.

Vaia co re-Sorteo: CIDADE DE SANTIAGO!

Era visto!, que dirían os vellos unha vez sabido o rival do EF Lalín infantil no novo sorteo. Non houbo sorte. Tocou nada menos que o, posiblemente, mellor equipo desta Fase de Ascenso a Liga Galega: o Cidade de Santiago. Todo un coco. Campión de Liga destacadísimo da zona de Santiago (só unha derrota en todo o campionato) e favorito en todas as quinielas. Ademais, xa non virán confiados a Lalín, pois lembrarán e moito o 7-1 da pasada tempada en alevíns (algúns coñecidos veranse de novo as caras no campo). Pero hai que mirar ese espello. Daquela foi algo polo estilo: eran favoritos, estaban invictos, clasificáranse en Arousa... E zapatazo ante os nosos "cativiños" moi concentrados. E na Liga regular só foron quen de gañarnos 2-1 e con apuros. Por iso hai que dicir tamén que se a EF Lalín non tivo sorte, tampouco o Cidade de Santiago a tivo, e estarán lamentando ese primeiro sorteo impugnado polo Calasanz. Saben que loitaremos por pasar.

Así pois, ida en Lalín o domingo 18 ás 11.00 da mañá. Alí teñen que estar animando os seareiros da Escola. Pero todos, eh.
Volta na fin de semana seguinte en Santiago. Quen supere a eliminatoria terá como rival ao vencedor do enfrontamento Ordes-Santa Comba.
Para abrir boca, as fotos pertencen ao partido de Liga EFLalín-Cidade desta mesma tempada. Ah, e Mario non se lle quedou coa camiseta na segunda.

Fase de Ascenso Infantil: xa hai rival

En principio (porque seica está impugnado por algún club) podemos calificar o sorteo para a Fase de Ascenso á Liga Galega Infantil para a EF Lalín como afortunado. Libramos do Cidade de Santiago, do Imperator e do Residencia, a priori os máis fortes. Correspondeunos o campión do Grupo 6º de segunda categoría autonómica Infantil: o SDR Numancia de Ares. Pero xa que as confianzas son o peor do deporte, convén non fiarse nadiña.
Primeiro partido en Lalín o 17 ou 18 (confirmarémolo), a volta en Ares. De pasar, tocaría un destes vellos coñecidos: Nicrariense ou Sp.Estrada.Algúns datos do noso rival: Fundación: 1948. Concello de Ares. Campo: Prados Vellos, herba artificial. Polo de agora non dispoñemos de foto do equipo, pero hai un vídeo en Internet.

Ver o blog: elnuman.blogspot.com, aí podedes ver algo do partido infantil Numancia-Meirás. Parecen grandotes.
Como o fixo na súa Liga? 1º clasificado do G6 de 2ª Autonómica infantil: xogados: 20; gañados: 18, empatados: 0, perdidos: 2; goles favor: 142, goles contra: 22; puntos: 54 (2º Portuarios: 53, 3º As Pontes: 46). Os dous partidos que perdeu foron ao remate da liga, cando xa estaba clasificado e precisamente ante o 2º e o 3º.

ÚLTIMA HORA: ao parecer confirmouse a impugnación do Calasanz e o SORTEO REPETIRASE o luns 12 de maio.

A xornada da EFL

Semella que aos benxamíns lles afectou o novo mes ou o Torneo de Vigo. Maio recende a flores e, si, foron tres as derrotas noutros tantos partidos do Torneo doméstico. Está claro que os rivais eran de moita entidade, que ía calor, que non estivemos ben ou que unhas veces se gaña e algunhas se perde. Pero xa había ben tempo que non se producía algó así. Non é unha desfeita, por suposto. É deporte. É xogo. Pero haberá moitos que xa anden coa mosca detrás da orella. Que pasa, pois? Non pasa nada. E se o miramos desde outra óptica? Coa derrota do equipo A o campionato vai ferver ata a derradeira xornada. Non é mellor que seguir en tensión? Ceder por primeira vez ante un rival (nada menos que un intratábel Callobre, falamos do seu campo) entra na lóxica. Así Sueiro xa mira para a visita final á Estrada. Aí estamos. E foi precisamente no país de Trasdeza onde caeron tamén os de Pablo. Era lóxico. E ídem para os de Toño. Neste caso os de Melide sacábanlles a cabeza a todos os nosos do C. Pero a cativiños pelexaron, competiron, que é o que se esixe. O demais darao o tempo. Senón, ao tempo.
En fin, que aínda temos unha Liga viva na EF Lalín. Mentres as demais categorías van esmorecendo co remate das súas competicións, os Benxamíns collen protagonismo.